बेक्ड व्हेजिटेबल्स - Baked Vegeables

Baked vegetables in English



वेळ: ३० मिनिटे

वाढणी: ३ जणांसाठी



साहित्य:

१ टेस्पून बटर

१ टीस्पून आले-लसूण-मिरची पेस्ट

१ कप कॉलीफ्लॉवरचे तुरे (मी ३/४ कप कॉलीफ्लॉवर आणि १/४ कप ब्रोकोली वापरली होती)

१/२ कप गाजर, लहान चौकोनी तुकडे

१/२ कप स्वीट कॉर्न (कॅनमधील)

१/४ कप फरसबी, १ सेमीच्या चकत्या

१/२ कप कांदा, बारीक चिरून

१/२ कप हिरवी भोपळी मिरची, लहान चौकोनी तुकडे

चवीपुरते मीठ

मसाले:- ३ चिमटी दालचिनी पावडर + २ चिमटी किंचीत भरड काळी मिरी + २ चिमटी वेलची पावडर

गरजेनुसार व्हाईट सॉस - रेसिपीसाठी इथे क्लिक करा

इतर साहित्य:

१/२ कप इटालीयन चीज ब्लेंड

१/२ कप चेडार चीज

१/४ कप ब्रेड क्रम्स (ऐच्छिक)

कृती:

१) ओव्हन ३५० F वर प्रीहिट करण्यास ठेवावे.

२) पॅनमध्ये बटर गरम करावे. आले-लसूण-मिरची पेस्ट घालून काही सेकंद परतावे. कांदा घालून पारदर्शक होईस्तोवर परतावा. नंतर कॉलीफ्लॉवर, गाजर, फरसबी, आणि भोपळी मिरची घालून मिनिटभर परतावे. आता कॉर्न, मीठ आणि मसाल्याचे मिश्रण घालून नीट मिक्स करावे.

३) परतलेल्या भाज्या ओव्हनसेफ काचेच्या भांड्यात काढाव्यात. यामध्ये गरजेनुसार व्हाईट सॉस घालावा. व्हाईट सॉसने भाज्या छान कोट झाल्या पाहिजेत. एकूण चीजामधील थोडे चीज यात मिक्स करावे. आणि उरलेले चीज आणि ब्रेड क्रम्स वरून सारखे पेरावे.

४) ओव्हनचे तापमान ४०० F करावे. मिश्रण ८ ते १० मिनिटे किंवा चीजचा वरचा थर हलकासा ब्राऊन होईस्तोवर बेक करावे.

तयार बेक्ड व्हेजिटेबल्स ब्राऊन ब्रेड बरोबर सर्व्ह कराव्यात.



टीप:

१) आवडीप्रमाणे वेगळ्या भाज्याही वापरू शकतो (उदा. मटार, बटाटा)

पास्ता - Pasta

Pasta in English

२ जणांसाठी
वेळ: ३० मिनीटे

साहित्य:
१ कप होल ग्रेन पेने पास्ता
१/४ कप लाल भोपळी मिरची, छोटे चौकोनी तुकडे
१/४ कप हिरवी भोपळी मिरची, छोटे चौकोनी तुकडे
१/४ टिस्पून लाल तिखट
३ टेस्पून ऑलिव ऑईल
१ टेस्पून पार्मिजान चिझ, किसलेले
२ चिमूट ओरेगानो
आवडीप्रमाणे रेड चिली फ्लेक्स
पास्ता शिजवण्यासाठी मिठ
३ टेस्पून पास्ता सॉस

कृती:
१) एका मोठ्या खोल पातेल्यात ५ ते ६ कप पाणी उकळवावे. त्यात मीठ घालून ढवळावे. पाणी उकळायला लागले कि त्यात १ कप पास्ता घालून १५ ते २० मिनीटे किंवा पाकिटावर दिलेल्या वेळेनुसार शिजवून घ्यावा. शिजवताना झाकण ठेवू नये तसेच मोठ्या आचेवर शिजवावा. त्यामुळे पाणी उतू जाण्याची शक्यता असते म्हणून एकदम खोलगट आणि मोठे पातेले घ्या. तळाला चिकटू नये म्हणून मधेमधे तळापासून ढवळावे.
२) पास्ता शिजला कि एका चाळणीत काढून घ्यावा आणि त्यावर थंड पाणी घालावे. सर्व पाणी निघून जाऊ द्यावे.
३) पॅनमध्ये १ टिस्पून तेल गरम करावे, त्यात भोपळी मिरची घालून १/२ ते १ मिनीट परतावे (टीप २). चिमूटभर ओरेगानो, लाल तिखट आणि मिठ घालावे. लगेच ३ टेस्पून पास्ता सॉस घालून लगेच शिजलेला पास्ता घालावा. गॅस मंद ठेवून १/२ ते १ मिनीट निट मिक्स करावे. वाटल्यास पास्ता सॉस वाढवावा. लगेच सर्व्हींग बोलमध्ये काढावे.
सर्व्ह करताना १ चिमूटभर ड्राय ओरेगानो चुरून भुरभूरावा. तसेच पार्मिजान चिझ घालावे आणि पास्ता सर्व्ह करावा.

टीप:
१) रेड चिली फ्लेक्स गरज वाटल्यास तिखटपणासाठी आवडीप्रमाणे घ्यावे.
२) भोपळी मिरची ३० ते ४० % शिजवावी पूर्ण शिजवू नये. भोपळी मिरचीचे तुकडे थोडे करकरीत राहिलेलेच चांगले लागतात.
३) पास्ता शिजताना जर पाणी कमी खुप कमी झाले असेल तर गरजेपुरते पाणी वाढवावे.

Labels:
Tomato Pasta, Pasta sauce, Homemade pasta sauce

पास्ता सॉस - Homemade Pasta Sauce

Pasta Sauce in English

साधारण १ कप पास्ता सॉस
वेळ: ३५ मिनीटे
साहित्य:
६ टोमॅटो
२ टेस्पून रेडीमेड टोमॅटो पेस्ट
३ टेस्पून ऑलिव ऑईल
४ मोठ्या लसूण पाकळ्या, पातळ चकत्या
१/४ कप कांदा, उभा पातळ चिरून
१/२ टिस्पून लाल तिखट
१ टिस्पून ड्राय ओरेगानो
२ चिमटी मिरपूड
मीठ
पास्ता कसा बनवावा?

कृती:
१) प्रत्येक टोमॅटोचे दोन तुकडे करा. मोठ्या बेकिंग ट्रेमध्ये १ टेस्पून ऑलिव ऑईल घालून हाताने पसरवून घ्या. टोमॅटोची चिरलेली बाजू प्लेटला लागेल अशा रितीने ठेवा त्याच भांड्यात लसूण पेरा.
२) दुसर्‍या छोट्या बेकिंग भांड्यात कांदा आणि थोडे तेल असे मिक्स करा. ओव्हन ४०० F वर प्रिहीट करून टोमॅटो आणि कांदा-लसूण १५ मिनीटे बेक करा. दोन्ही भांडी मधल्या कप्प्यावर ठेवा. मधेमधे कांदा आणि लसूण जळत नाहीत ना हे चेक करा.
३) बेक झाल्यावर टोमॅटोला पाणी सुटलेले असेल. कांदा लसणीचा रंग किंचीत बदलला असेल. सर्व गार झाले कांदा बारीक चिरून बाजूला ठेवावा. टोमॅटो आणि लसूण मिक्सरमधून बारीक करून घ्यावे.
४) पॅनमध्ये ऑलिव ऑईल किंचीत गरम करावे त्यात लाल तिखट, कांदा घालून परतावे. नंतर टोमॅटोचे मिश्रण घालावे, ढवळावे. टोमॅटोची पेस्ट घालावी. निट मिक्स करावे आणि मंद आचेवर १०-१५ मिनीटे शिजू द्यावे.
५) सॉस थोडा दाट झाला कि त्यात ओरेगानो, मिरपूड आणि मिठ घालावे २ मिनीटे मंद आचेवर उकळू द्यावे. काचेच्या बरणीत काढून ठेवावा.
हा सॉस साधारण ५ ते ६ जणांच्या सर्व्हींगसाठी उपयोगी पडेल.

टीप:
१) टोमॅटो पेस्टमुळे रंग छान येतो. जर टोमॅटो पेस्ट मिळत नसेल तर थोडा टोमॅटो केचप जो फार गोड नसेल असा वापरू शकतो. पण यामुळे चवीत किंचीत फरक पडेल.
२) जर ओरेगानो हर्ब मिळत नसेल तर बेसिल किंवा थाईमही या सॉसमध्ये वापरू शकतो, प्रत्येक हर्बची चव वेगवेगळे असते त्यामुळे चवीत हर्बच्या फ्लेवरनुसार फरक पडेल.

Labels:
pasta sauce, tomato pasta sauce, Oregano pasta sauce